My Sister’s Keeper

Greinilega er leikstjórinn Nick (sonur meistarans John) Cassavetes afar stoltur af því að hafa náð að græta kvenmenn – ásamt fáeinum karlmönnum – á öllum aldri með The Notebook, sem var gerð fimm árum á undan þessari. Þess vegna ákvað hann að búa til mynd sem gengur nánast alfarið út á það að dæla út tárum við hvert tækifæri. Og hvernig gerir hann það? Að sjálfsögðu með öllum gömlu brellum bókarinnar: krabbameinssöguþræði, væminni tónlist, slow motion-skotum, pínlegum nærmyndum af tárum leikaranna og síðast ekki síst gömlum tuggum þar sem persónur hamra á því hvað þeim líður illa. Ef mér skjátlast ekki þá líða varla fimm mínútur á milli atriða þar sem fólk grætur, sem er svosem skiljanlegt miðað við umfjöllunarefnið, en fólk sem tárast auðveldlega yfir bíómyndum ætti að búa sig undir átakanlegt bíókvöld. Það má gleyma því að hafa vasaklúta við hendi. Hentugra væri að grípa heila fötu.

Persónulega fannst mér myndin frekar ódýr í dramanu, eða kannski frekar alveg ógeðfellt ódýr. Hún er áhrifarík að vissu leyti en allan tímann leið mér eins og leikstjórinn hafi ætlast til að ég myndi finna fyrir tárum frekar en að leyfa dramanu að virka á mann eðlilega og sjálfkrafa, án þess að styðjast við yfirdrifna tónlistarnotkun og klisjukennda frasa. Því miður lenti ég oft í því að þurfa að sitja yfir lélegum sjónvarpsmyndum á Hallmark-rásinni með múttu í denn og satt að segja er My Sister’s Keeper ekkert ólík slíkum, nema jú, hún hefur þekktari leikara í forgrunni.

Það er lítið hægt að setja út á leikaranna í myndinni (nema kannski Cameron Diaz, sem jaðar við það að vera röng manneskja í hlutverkinu sínu) og í raun verð ég svolítið að dást að því hvernig þeir meikuðu þessa endalausu táraflóðspyntingu leikstjórans. Fólkið á skjánum hefði alveg getað látið myndina virka betur, en handritið og leikstjórnin var einum of. Það er að vísu eitt ákaflega gott atriði sem stóð upp úr og sú sena er gjörsamlega í höndum Joan Cusack. Það er ótrúlegt, en hún sýndi öflugri tilþrif og meiri persónuleika í þessu eina atriði heldur en flestir aðrir gera út alla myndina. Og hvergi heyrðist mjúk melódramatísk tónlist.

Ég skil ekki alveg hvað leikstjórinn var að pæla með svona þvingaðri sögu, eða réttara sagt þvingaðri útfærslu á sögu sem hefði átt að gefa manni rothögg í sálina. Hingað til hef ég haft fínt álit á manninum. Ég meira að segja fílaði Notebook tiltölulega vel. Hún var væmin á sumum stöðum, hjartnæm á öðrum en almennt komst fín saga til skila með líflegum persónum. Það er samt alveg hægt að segja að My Sister’s Keeper þjóni tilgangi sínum. Stelpur í tonnatali munu eflaust láta undan þeim brjálaða þrýstingi leikstjórans að gráta yfir senum sem „vilja“ að þú grátir yfir þeim. Umfjöllunarefnið málar fólk líka svolítið út í horn, eins og það sé verið að segja óbeint við mann að maður sé kvikindi fyrir að grenja ekki yfir myndinni. Krabbamein er skelfilegt mál, augljóslega, en það gerir það þá bara meira pirrandi þegar það er notað sem grundvöllur fyrir svona myglaða sápukúludramatík.

Það er alveg hægt að færa rök fyrir því í þessu tilfelli að ég sé með hjarta úr stáli (og hreðjar vonandi líka), en fyrir mér voru dramaatriði þessarar myndar álíka fyrirsjáanleg og lin og flestar bregðusenur eru í hinum dæmigerðustu ungingahrollvekjum. Ég held mínum karlmannalegu tárum léttilega aftur nema þegar ég finn eitthvað sem verðskuldar þau. My Sister’s Keeper er ansi langt frá því að vera í þeim flokki og ef maður skoðar aðeins hvað annað kom út á þessu sama ári þá voru upphafssenurnar í t.d. Up tíu sinnum hjartnæmari heldur en öll þessi mynd. Hún græðir samt nokkur stig út á Alec Baldwin. Hann er maðurinn!

Besta senan:
Joan, þú átt leik.

Categories: Drama | Ein athugasemd

Leiðarkerfi færslu

One thought on “My Sister’s Keeper

  1. Tómas G.

    Sammála öllu hér. En er ég sá eini sem fýla Alpha Dog í tætlur? Fannst Nick gera helvíti vel þar. Eina Nick myndin sem hefur látið mig fara að gráta.

Sammála/ósammála?

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google+ photo

You are commenting using your Google+ account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s

Bloggaðu hjá WordPress.com.