Reykjavík

Í fyrstu virðist allt ganga prýðilega fyrir sig í sambandi Hrings og Elsu, en það rýrnar óskaplega hratt þegar hann týnir sér í peningaskuld, ofan á neistinn bara ekki hinn sami og áður var. Á fljótu bragði sparkar hún honum út og díla þau bæði við aðlaganirnar og erfiðin við slíka sundrun, en bæði fara hratt leitandi að rébándi hvor í sinni átt.

Það eru auðvitað hversdagslegir og manneskjulegir straumar þarna hjá persónum myndarinnar, aðal- sem auka, en þeim er oft stillt upp með samræðum sem anga af hreinni tilgerð. Áhorfandinn á erfitt með að finna fyrir bömmernum í aðskilnaði þessa pars því fljótt þykir mér koma til skila að parið er á gerólíkri bylgjulengd og mjög erfitt að sjá sundrunina sem annað en jákvæðan hlut.

Það er ýmist sem Reykjavík vill vera, t.a.m. sambandsstúdía í Woody Allen-stíl (og ekki fyrsta íslenska myndin á þessu ári sem sækir í þann brunn, ef við teljum Fyrir framan annað fólk með) og hnyttinn, tragikómískur farsi en heldur ekki réttum fókus. Ákvörðunartökur persóna eru mikið úr takti við allan veruleika á köflum og kemur sjálfumglaður, týndur tónn á það sem virðist vera mjög persónuleg saga, sem ætti að vera viðtengjanlegri en hún er. Persónur birtast líka inn í söguna eftir þörfum handritsins, oft á pínlegan máta. Ísland er lítið, en ekki SVONA lítið.

Leikstjórinn Ásgrímur Sverrisson hefur augljóslega hjartað á réttum stað í leikstjórasætinu en skortir fókus með persónusköpun og narratífu. Annars stráir hann kvikmyndaþekkingu sinni og passjóni hressilega yfir allt handritið (og óbeint endurskapar misþekktar senur inn á milli, Annie Hall t.d.), en úrvinnsluna skortir alla súbtextana sem krefst af umfjöllunarefninu. Við komumst aldrei almennilega inn í hausinn á persónunum.

Spænski tökumaðurinn Néstor Calvo gefur myndinni kaldan, léttan en hroðvirknislegan svip en græðir á prýðis djasspíanótónum í andrúmsloftinu. Leikstjórinn kvikmyndar þó ekki titluðu höfuðborgina á aðlaðandi eða einkennandi máta þegar fínt tækifæri gafst til þess að gefa henni smá auka karakter. Við sjáum aðallega skot af höfninni og glefsur af miðbænum, og kemur m.a.s. á óvart hvað lykilhlutar gerast augljóslega í Kópavoginum, eða hvað (gamla) Elko lindum skiptir söguþræðinum miklu máli. Þessi mynd hefði svo innilega átt að heita eitthvað annað.

maria-hringur-i-búðinni-1

Hringur er reyndar leikinn af nærgætni, smá sérvisku og sympatíu af Atla Rafni Sigurðarssyni, karakter sem er á annan veg svo óviðkunnanlegur og óspennandi. Stúlknabrask hans, tilvistarkreppa eða breytingarskeið skilar ekki af sér sannfærandi örk (og lokasenan, þó svo að hún þematískt smelli, er algjör hörmung…). Framvindan gengur á notalegum hraða en dregur helbert tómarúm eftir sér þegar ekki einu sinni Elsa kemur út sem þrívíður eða heillandi karakter. Með meira í höndunum hefði Nanna Kristín getað skilið meira eftir sig, því vannýtt er hún. Gríma Kristjánsdóttir er sömuleiðis sætt andlit í leit að propper karakter, býsna klunnalega meðhöndlaðan miðað við mikilvægi. Aukaleikarar í heild sinni eru vægast sagt missannfærandi.

Hringur rakkar annars niður allt „bíódraslið“ og kýs innihaldsríkari, dýpri, listrænni og sannleiksríkari kvikmyndir sem sífellt gefa. En umræddur karakter er staddur í sögu sem verður fljótt að vondri klisju, og stöðugu tilvísanirnar í vandaðri myndir eða þær sem glittir í (þ.á.m. The Fountain, Brazil, Pulp Fiction, Santa Sangre… Vonarstræti, sem fær þarna gargandi plögg) freista mann meira um að beila á þessari og horfa á eitthvað annað í staðinn. Ásgrím væri ég þó alveg til í að sjá prufa sig meira áfram.

bladn

 

Categories: Drama, Gamanmynd | Færðu inn athugasemd

Leiðarkerfi færslu

Sammála/ósammála?

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s

Bloggaðu hjá WordPress.com.